கல்கிஸ்ஸை கடற்கரை வீதிக்கு திரும்பும் சந்தியில் இன்று (மே 5) காலை 6.35 மணியளவில் இடம்பெற்ற துப்பாக்கிச் சூட்டில் 19 வயது இளைஞர் ஒருவர் உயிரிழந்தார். இந்த சம்பவம் தொடர்பான சிசிடிவி காட்சிகள் தற்போது வெளியாகியுள்ளன.
தற்போதைய தகவல்களின் படி, மோட்டார் சைக்கிளில் வந்த இருவர், அந்த இளைஞரை குறிவைத்து துப்பாக்கியால் சுட்டுவிட்டு தப்பிச் சென்றுள்ளனர். துப்பாக்கிச் சூட்டில் கடுமையாக காயமடைந்த இளைஞர், உடனடியாக களுபோவில போதனா வைத்தியசாலைக்கு கொண்டு செல்லப்பட்டபோதும், சிகிச்சை பலனின்றி உயிரிழந்தார்.
சம்பவ நேரத்தில், நகர சபையில் பணியாற்றும் இளைஞர் ஒருவர் கடற்கரை வீதிக்கு அருகிலுள்ள கிளை வீதியில் சுத்தம் செய்து கொண்டிருந்ததாக தெரியவந்துள்ளது. இச்சூட்டுவெடிப்பு நிகழும் தருணங்கள் அருகிலுள்ள சிசிடிவி கமெராவில் பதிவாகியிருந்ததுடன், அந்த காட்சிகள் அத் தெரணவுக்கு கிடைத்துள்ளன.
மேலும், சுட்டவர்களில் ஒருவர் தப்ப முயலும் நிலையில், பாதிக்கப்பட்ட இளைஞன் ஓடிச் சென்றதையும், அவரை தொடர்ந்து திரும்பிய சந்தேக நபர்கள் மீண்டும் அவரை துரத்திச் சென்று சுட்டுக் கொன்றதையும் மற்றொரு சிசிடிவி கமெரா பதிவு செய்துள்ளது.
தெஹிவளை ஓபன் பிளேஸைச் சேர்ந்ததாக கூறப்படும் இந்த இளைஞனின் கொலைக்கான காரணம் இதுவரை வெளிவராத நிலையில், அவரின் குடும்ப பின்னணியும் தற்போது விசாரணைக்கு உட்படுத்தப்பட்டுள்ளது. குறிப்பாக, அவரது தாயார் தற்போது போதைப்பொருள் விற்பனை குற்றச்சாட்டில் சிறையில் இருக்கிறார் என தகவல்கள் தெரிவிக்கின்றன. மேலும், 2023ஆம் ஆண்டு, இளைஞர் போதைப்பொருள் சம்பந்தமான வழக்கில் கைது செய்யப்பட்டிருந்ததுடன், பிரபல போதைப்பொருள் கடத்தல்காரரான படோவிட்ட அசங்கவின் உறவினராகவும் கூறப்படுகிறது.
இக்குற்றச்செயலைக் காணொளி ஆதாரங்களுடன் தொடர்ந்து விசாரித்து வரும் பொலிஸார், மேல் மாகாண தெற்கு பிரிவுக்குப் பொறுப்பான பிரதி பொலிஸ் மா அதிபர் கயங்க மாரப்பனவின் மேற்பார்வையில் விசாரணைகளை தீவிரப்படுத்தியுள்ளனர்.
இந்த திடுக்கிடும் தாக்குதலில் ஈடுபட்டவர்கள் விரைவில் கைது செய்யப்படும் என எதிர்பார்க்கப்படுகிறது.
இந்தச் செய்தியில் மேலும் விவரங்கள் வெளியாகும் முன்னர், இது தொடர்பான தகவல்களைக் கொண்டவர்கள் பொலிசாரைத் தொடர்புகொள்ளுமாறு கேட்டுக் கொள்ளப்பட்டுள்ளது.
0 Comments